Nëntë viktima, 98 raste të reja dhe 104 pacientë të shëruar është bilanci i Covid-19 për 24 orët e fundit në Maqedoninë e Veriut. Në mesin e viktimave janë dy nën moshën 30 vjeçare, respektivisht një 23 vjeçar nga Shkupi dhe një 29 vjeçar nga Strumica.

Viktima nga Shkupi evidentohet si viktima më e re si pasojë e Covid-19 në Maqedoninë e Veriut. Më shumë raste të reja janë regjistruar në Shkup, ndërsa qytetet e tjera kanë nën 10 të infektuar.

Edhe numri i të shëruarve më i lartë është në Shkup. Indeksi i infeksionit në raport me numrin e testeve sot shënon 7 për qind. Që prej fillimit të pandemisë, Maqedonia e Veriut regjistron 15,925 persona të infektuar, 13,418 të shëruar dhe  661 viktima. Aktualisht numri i rasteve aktive në vend është 1,846.   Në total janë 167,760 teste për Covid-19, 1,404  vetëm në 24 orët e fundit.