Aktorja Ema Andrea u bën thirrje qytetarëve shqiptarë të përshtaten me normalitetin e ri, teksa nënvizon se nëse nuk të shtrëngon dorën apo përqafon, e bën se të do dhe jo e kundërta. Përmes një videomesazhi, të shpërndarë nga ministrja e Shëndetësisë dhe Mbrojtjes Sociale, Ogerta Manastirliu, aktorja Ema Andrea thekson se normaliteti i ri kërkon një sakrificë të vogël.
“Situata në të cilën po jetojmë na mëson të përshtatemi me një normalitet të ri, në të cilin duhet të qëndrojmë larg njëri tjetrit, në të cilin do të na mungojnë përqafimet, në të cilin do të na mungojnë shtrëngimet e duarve. Mua kjo nuk më duket sakrificë. Me duket më e pakta që mund të bëjmë për të ruajtur jetën tonë dhe jetën e atyre që i kanë dhënë kuptim jetës tonë, njerëzve tanë të dashur. Ta duam jetën, ta duam të ardhmen. Nëse nuk të përqafoj, nëse nuk ta shtrëngoj dorën e bëj sepse të dua, dhe jo e kundërta”, theksoi aktorja Ema Andrea.
