Trupi i 35-vjeçarit Konstandinos Katsifa, që u vra nga forcat RENEA në Bularat të Gjirokastrës, pritet t’i dorëzohet familjes së tij nesër pasi nuk ka mbetur më asnjë veprim për t’u kryer mbi kufomën.
Avokati i familjes Katsifa Efthimios Navridis tha se po presin dorëzimin e trupit nga autoritetet shqiptare pas kryerjes së disa ekspertizave mjeko- ligjore në kuadrin e hetimit të hapur për vrasjen apo ekzekutimin nga afër të 35-vjeçarit minoritar.
“Nuk ka mbetur më asnjë dëshmitar për t’u pyetur”, ka thënë avokati i tij. Është paralajmëruar se në varrimin e të ndjerit mund të ketë ndonjë incident të mundshëm, për shkak të pjesëmarrjes në ceremoninë mortore të përfaqësuesve të Agimit të Artë nga Greqia, edhe pse familja ka apeluar që kjo çështje të lihet jashtë politikës.
Tashmë kanë kaluar tetë ditë nga vrasja, javë në të cilën ka pasur një retorikë të nxehtë mes dy vendeve, Shqipërisë dhe Greqisë.
