Me kërkesë të ministrit të Drejtësisë, Ulsi Manja, Këshilli i Ministrave ka larguar sot nga detyra drejtorin e Përgjithshëm të Burgjeve, Agim Ismaili, duke emëruar në këtë post Admir Abrijan.
Por, kush është Admir Abrija, që do të drejtojë tashmë Burgjet?
Admir Abrija ka mbajtur një sërë postesh të rëndësishme, nga Garda e Republikës, te Dogana e deri si Prefekt i Tiranës. I diplomuar për drejtësi, Abrija ka edhe licensën e avokatit. Ai ka punuar si oficer sigurie i Gardës së Republikës në vitin 1999, dhe më pas është bërë zëdhënës i këtij institucioni.
Më vonë, ka punuar si Shef Sigurie në Presidencë, në kohën kur ky institucion drejtohej nga Bamir Topi. Ai ka shërbyer edhe në radhët e policisë, ku ka mbajtur edhe postin e drejtuesit, mes të cilave edhe Drejtorinë e Kufirit në Gjirokastër.
Më tej, Admir Abrija u emërua zëvendësdrejtor i Përgjithshëm i Doganave, ku kishte nën varësi sektorin e antikorrupsionit dhe hetimit. Pas këtij posti, ai do të emërohej si Prefekt i Tiranës, ndërsa sot i është besuar Drejtoria e Burgjeve.
