Një lajm i mirë vjen për të gjithë adhuruesit e filmave. Pas 33 vitesh, është konfirmuar rikthimi i filmit “Dirty Dancing”. Ka qenë drejtori i përgjithshëm i studios, Jon Feltheimer, që e ka bërë të ditur vazhdimin e filmit, duke u shprehur se: “Do të jetë saktësisht lloji i filmit romantik, nostalgjik që i dha gjithë famën dhe dashamirësinë filmit të parë”.
Filmi i vitit 1987 kishte si aktorë kryesorë: Jennifer Grey dhe Patrick Swayze, të cilët gjejnë dashurinë në një resort pushimesh. Aktorja, Grey, raportohet se do të jetë edhe në filmin e radhës, por nuk dihet ende se cili do të luajë në vendin e Patrick, i cili humbi jetën në vitin 2009, për shkak të kancerit të pankreasit.
Jennifer Grey do të jetë gjithashtu edhe producente ekzekutive e projektit, ndërsa fansat janë shprehur konfuzë për rikthimin. Kujtojmë që ky film është cilësuar si një nga më të mirët e të gjitha kohërave. Ndërsa skena, në të cilën çifti kërcen me këngën e famshme, është një nga më të famshmet që kujtohet edhe sot.
