Sali Berisha ka diskutuar mbi një orë me Enkelejd Alibeajn dhe Gazmend Bardhin në selinë e PD-së dhe duket se ka dalë i pakënaqur nga ky dialog. Ndonëse ai deklaroi në konferencën për shtyp pas takimit se kishin shtrënguar duart dhe se këtë gjë nuk do nguronte ta bënte edhe me Bashën, nëse ai do të ndodhej aty, Berisha para gazetarëve foli gjatë për marëdhëniet e tij për kryetarët e degëve lokale dhe për koncesionin që po i bëntë atyre për të shtyrë zgjedhjet për liderët lokalë nga data 6 në 30 prill.
Fakti se ai vendosi si çështje të parë marëdhëniet me degët lokale tregoi se takimi me Alibeajn dhe Bardhin nuk kishte arritur kompromis. Vetëm në fund Berisha tha: “Ju keni kuriozitet se çndodhi aty brenda”.
Nga ato që tregoi u kuptua se s’donte të thoshte shumë detaje. Ai pohoi: “I pashë Bardhin dhe Alibeajn të preokupuar për bashkimin e demokratëve, por diferencat në qëndrime persistojnë”.
Sipas burimeve të Lapsit, brenda takimit me dyer të mbyllura ata i kanë kërkuar Berishës të bëjë edhe ai “një hap pas” sipas qëndrimit që ka mbajtur grupimi pro Bashës. Natyrisht lideri historik nuk e ka pranuar një kërkesë të tillë.
“Unë do të garoj në një sfidë të hapur, nuk vendos më Berisha për veten por vendosën ata që votiuan në 6 mars. Fati im është në dorë të antarësisë” këmbënguli Berisha para gazetarëve, pa u tërhequr asnjë centim nga qëllimi i tij.
“Ata dukej më shumë sikur kërkonin një pazar për vete” tha për Lapsi.al një burim i mirëinformuar për takimin. Por në konferencën për shtyp lideri historik u shpreh: “S’mund të ketë pazar mes demokratëve, por kompromis mes grupeve me qëndrime të ndryshme”.
Po si e sheh Berisha këtë kompromis? Ai e quan kryesinë aktuale të shkarkuar nga kuvendi i ligjshëm i 11 dhjetorit, por ama i ka dhënë hapsirë Alibeajt si kryetar i grupit parlamentar. “Komisioni i rithemelimit e njeh grupin parlamentar. Unë i propozova Alibeajt që diskutimet të zhvillohen në këtë forum legjitim dhe ai u duk se ishte dakord me këtë ide” tha Berisha që duket se po kërkon një forum që e pranon edhe kongresi i 11 dhjetorit si legjitim.
Pra duket se takimi ka arritur në përfundimin që hapsira ku do zhvillohen negociatat mes grupeve rivale do jetë grupi parlamentar që është forumi që pranohet nga të gjitha palët. Por dy pikat ku Alibeaj e Bardhi nuk kanë rënë dakord me njëri-tjetrin kanë qenë dy: Ajo që Berisha të tërhiqet nga kandidimi për kryetar dhe së dyti vedimi i gjykatës që i jep të drejtë grupit të rithemelimit.
