Në Malin e Tomorrit nisi pelegrinazhi 5 ditor i festës së Abaz Aliu që çdo vit mbledh atje deri në disa mijëra besimtarë. Ata kryejnë ritet fetare në malin e cilësuar të shenjë e bëjnë kurban duke u lutur për shëndet e mirësi në familje. Pelegrinët e parë në Malin e Tomorrit kanë mbërritur. Pranë Teqesë së Kulmakut po ngrihen çadrat ku do të akomodohen. Ata kanë udhëtuar mijëra kilometra nga nga anembanë Shqipërisë. “Po vendosim çadrën atje, është vend i shenjtë. Vimë gjithnjë këtu, Zoti të na e bëjë kabull”.
20 gushti shënon nisjen e ditëve të Abaz Aliut që kremtohet me pelegrinazhin 5 ditor në malin që bektashinjtë e cilësojnë të shenjtë. “Më duket sikur jam shumë më i lehtë, shumë më i gëzuar çdo vit që vij.” Kryejnë ritet fetare në varrin e shenjtorit Abaz Ali, e bëjnë kurban duke u lutur më shumë shëndet dhe mirësi për familjet e tyre. “Sa erdhëm bëmë ato adetet.” “Mirësi dhe lumturi, harmoni në familjet e tyre!”
Por për të mbërritur deri në Kulmak nuk është e lehtë. “Përmirësim kishte, por rruga duhet të jetë më e mirë. Asgjë tjetër nuk i pengon për të ardhur këtu.” Në fakt janë tre rrugë që të çojnë drejt Teqesë. Por aksi Pronovik-Novaj-Teqe sipas policisë është i rrezikshëm. Ndaj policia orienton pelegrinët të udhëtojnë në rrugën Berat- Çorovodë-Gjerbës-Kulmak.
“U tërheqim vëmendjen të gjithë drejtuesve të mjeteve që të kenë kujdes. Mos të drejtojnë mjetin pas përdorimit të pijeve alkoolike pasi policia rrugore nuk do të tolerojë.” 300-400 mijë pelegrinë pritet të qëndrojnë në majën e Tomorrit gjatë ditëve të Pelegrinazhit që kulmin e arrin më 23 gusht. Organizatorët thonë se kanë marrë të gjitha masat për garantimin e ujit të pijshëm, energjisë dhe sigurisë.
