Gjykata e Tiranës ka lënë në burg shtetasin Iranian Bijon Pooladrag të arrestuar dy ditë më parë në vendin tonë, i cili akuzohet se ndërhynte në të dhënat kompjuterike në mënyrë të paligjshme. Nga hetimi ka rezultuar se ai kryente komunikime nëpërmjet një aplikacioni në rrjet, të cilin e përdorte duke e lidhur me numrat e telefonave celularë të personave të tjerë. Më pas ai siguronte kodin e verifikimit të aplikacionit në forma të ndryshme nga këta persona, duke vënë në funksionim aplikacionin në aparatet e tij kompjuterike.
Gjatë kontrollit të banesës dhe kontrollit shtetasit iranian në cilësinë e provës materiale u sekuestruan 4 telefona celularë, një USB, 3 dokumente udhëtimi, 10 karta sim dhe dokumente të tjera të ndryshme. Ndaj tij rëndojnë akuzat për veprat penale “Pergjim i paligjshem i të dhënave kompjuterike”, “ndërhyrje në të dhënat kompjuterike”, “keqperdorim i pajisjeve” dhe “ndërhyrje në sistemet kompjuterike”.
