Pak ditë më parë, Enkelejd Alibeaj mori një vendim në emër të grupit parlamentar të PD-së, duke përjashtuar nga grupi katër deputetët Oerd Bylykbashi, Belind Këlliçin, Tritan Shehun dhe Agron Shehaj.
Në lidhje me këtë vendim, Alibeaj është pyetur nga gazetarët në Sarandë, ku ka marrë pjesë në një takim me strukturat e kësaj dege.
Alibeaj deklaroi se ai është drejtues i PD-së pas shkëputjes së Lulzim Bashës dhe është përfaqësues i gjithë atyre demokratëve që kanë vendosur të shkëputen nga periudha tridhjetë e ca vjeçare e politikës shqiptare.
“Gjej rastin të ndodhem mes demokratëve të Sarandës jo vetëm për të festuar por edhe për të diskutuar gjendjen dhe situatën politike së pari në Sarandë, sfidat që na presin, por edhe për zhvillimet lart në qendër. Unë jam drejtues i PD pas shkëputjes së Lulzim Bashës. Unë jam përfaqësues i gjithë atyre demokratëve që kanë vendosur të shkëputen nga periudha tridhjetë e ca vjeçare e politikës shqiptare. Unë e kuptoj fare mirë hallin e atyre që herë pas here bëjnë këto lëvizje agresioni.
Është hall i Sali Berishës dhe Edi Ramës. Jam mësuar tashmë me këto etiketime duke më vënë në krah të Edi Ramës. Media e ka bërë publike se kush ka qenë bashkë me Edi Ramën. Ata që janë bashkë kanë arsye hallet e tyre personale”, deklaroi Alibeaj.
Mes të tjerave ai shtoj se është dakord që demokratët të shkojnë bashkë në zgjedhje.
