Reshjet intensive të shiut kanë shkaktuar përmbytje të mëdha thuajse në të gjithë vendin, por situata më problematike shfaqet në Durrës.
Thuajse të gjitha lagjet e qytetit janë përmbytur, duke e bërë të pamundur lëvizjen e qytetarëve, të cilët e kanë gjetur zgjidhjen duke bërë sërf nëpër rrugët e kthyera në lumenj.
Po ashtu, në Durrës është përmbytur edhe nënkalimi i Velierës. Siç shihet edhe nga pamjet, autoritetet kanë vënë shiritin duke bllokuar lëvizjen, ndërsa uji po pastrohet me pompë.
Si pasojë e situatës së rënduar, 8 familje janë evakuuar nga banesat e tyre, për shkak të rrezikut nga uji dhe dëmtimet e mundshme. Ndërkohë autoritetet kanë njoftuar se shkollat, kopshtet dhe çerdhet do të jenë pushim.
Reshjet e dendura kanë shkaktuar probleme edhe në institucionet publike, ku raportohet se është përmbytur edhe burgu i Durrësit.
Ministri i Drejtësisë, Besfort Lamallari ka zbarkuar në terren, ndërsa ka shkuar nga afër për të parë situatën në burg, ku qëndrojnë të izoluar dhe disa persona të politikës shqiptare.
Lamallari shihet teksa ecën përgjatë rrugës të kthyer në lumë, ndërsa ‘çan’ ujin i veshur me veshje speciale, si çizme të gjata deri në brez. Kujtojmë se në këtë burg janë izoluar ish-ministri i Shëndetësisë, Ilir Beqaj, kryebashkiaku i Tiranës, Erion Veliaj si dhe ish-deputeti socialist, Jurgis Çyrbja.
