Situata me përmbytjet në Vlorë dhe në Fier duket se mbetet ende problematike. Si pasojë e reshjeve të shumta të shiut dhe nga dalja e Lumit Vjosa, janë përmbytur dhjetëra banesa dhe një numër i madh qytetarësh janë evakuuar. Në lidhje me këtë situatë, ka reaguar ministria e Arsimit, ku me anë të një postimi, Evis Kushi ka njoftuar se ditën e nesërme do të qëndronin të mbyllura disa prej shkollave si pasojë e pamundësisë për të zhvilluar mësim.
Njoftimi i Plotë: Të dashur nxënës, mësues dhe prindër, Po ndjekim me kujdes situatën e krijuar në Qarkun e Vlorës dhe atë të Fierit nga reshjet e dendura të ditëve të fundit, të cilat kanë shkaktuar daljen nga shtrati të lumenjve dhe përmbytje në disa zona rreth tyre. Zyrat vendore arsimore parauniversitare në bashkëpunim me shtabet përkatëse të emergjencave civile po ndjekin nga afër situatën e krijuar edhe në shkollat që ndodhen në këto zona.
Për të shmangur çdo lloj rreziku, Ministria e Arsimit dhe Sportit vendosi që mësimi të mos zhvillohet në shkollat e mëposhtme, deri në përmirësimin e situatës:
Gjimnazi “Hajredin Beqari”, Selenicë
Shkolla 9-vjeçare “Todi Koceli”, Selenicë
Shkolla vartëse e arsimit fillor “Sile Hoxha”, Rromës
Shkolla 9-vjeçare “Sabri Pelivani”, Karbunarë
Shkolla 9- vjeçare vartëse “Thoma Sema”, fshati Ferras. Do t’ju lutesha që të bënit sa më shumë kujdes gjatë lëvizjeve tuaja deri në përmirësimin e situatës në zonat e përmbytura.
