Uniformat blu kanë mundur të lokalizojnë vendndodhjen e Gëzim Saraçit, i dyshuari si atentator i kryebashkiakut të Lushnjes, Fatos Tushe. Sipas policisë, Saraçi, i cili është person me rrezikshmëri të lartë, dyshohet se mund të fshihet te familjarë apo miq të tij në qarkun e Beratit. Por Policia e Shtetit kërkon ndihmën e qytetarëve dhe i bën thirrje të dërgojnë informacion apo fotografi në numrin e telefonit 0694107337. Për këdo që jep informacion të vlefshëm që çon drejt kapjes së Saraçit, është vendosur edhe një shpërblim prej 1 milion lekësh të reja. Pas konfliktit mëngjesin e sotëm para Bashkisë së Lushnjes, Gëzim Saraçi, ish shofer i Fatos Tushes, hodhi brenda zyrës së kryebashkiakut një granatë dore duke e plagosur atë dhe sekretaren Erisa Qalliu. Të dy janë jashtë rrezikut për jetën.
Categories
Lajme
