Policia e Shtetit ka vijuar edhe sot operacionin policor të koduar “Plazhi i lirë”, i cili synon lirimin e hapësirave publike përgjatë vijës bregdetare si dhe verifikimin e ligjshmërisë së veprimtarisë së subjekteve private.
Në zonën bregdetare të Semanit, strukturat e Policisë së Fierit, në bashkëpunim me Seksionin për Krimin Ekonomik dhe Policinë Bashkiake, kanë identifikuar dhe liruar tre sipërfaqe publike të zëna në mënyrë të paligjshme nga subjekte private.
Gjatë kontrolleve, u konstatua se tre persona kishin vendosur rreth 150 komplete me çadra dhe shezlongë, pa lejen përkatëse nga autoritetet. Të tre janë proceduar penalisht për veprat penale: “Pushtimi i tokës”; “Fshehja e të ardhurave”; “Ushtrimi i aktivitetit tregtar pa kasë fiskale”.
Materialet procedurale për këta shtetas i janë referuar Prokurorisë pranë Gjykatës së Shkallës së Parë Fier, për veprime të mëtejshme ligjore.
Policia e Shtetit bën me dije se kontrollet do të vijojnë në të gjithë bregdetin shqiptar gjatë sezonit veror, me qëllim garantimin e qasjes së lirë në hapësirat publike për qytetarët dhe respektimin e rregullave ligjore nga subjektet private.
