Policia Bashkiake dhe ajo Rrugore në Vlorë këtë të mërkurë paralajmëruan për herë të fundit drejtuesit e mjeteve rrethqytetase, interurbane dhe ndërkombëtare që të largojnë automjetet nga Rruga e Re, sipas vendimit nr. 106, datë 23 dhjetor 2025.
Sipas këtij vendimi, mjetet duhet të zhvendosen drejt aksit që lidh Transballkaniken me autostradën e Vlorës. Disa shoferë që nuk respektuan udhëzimin u përballën me gjoba. “Sipas vendimit nr. 106, datë 23 dhjetor 2025, mbi ‘përcaktimin e vendqëndrimit të mjeteve të transportit rrethqytetas, interurban dhe ndërkombëtar’, është përcaktuar zhvendosja e këtyre furgonave nga Rruga e Re në drejtim të aksit që lidh Transballkaniken me autostradën e Vlorës.
Ky vendim ka nisur të zbatohet, ku shumica e furgonave dhe autobusëve janë zhvendosur në aksin pranë paraburgimit, por ka edhe mjete të tjera të cilat, në kundërshtim me këtë vendim, qëndrojnë ende në Rrugën e Re. Kjo gjë ka detyruar Policinë Bashkiake dhe atë Rrugore të dalin përgjatë kësaj të mërkure për një inspektim në zonë. Për shumë prej mjeteve që qëndronin në Rrugën e Re është bërë këshillimi i tyre mbi vendimin dhe vendin e ri ku duhet të qëndrojnë.
Paralajmërimi i fundit është ky: nëse do të ketë përsëritje, këto mjete do të ndëshkohen me gjoba; sipas informacioneve, nuk do të ketë tolerime. Përgjatë inspektimit nuk kanë munguar as gjobat për mjetet të cilat janë konstatuar në përsëritje të shkeljes. Është dita e disatë që efektivë të Policisë Bashkiake dalin për aksion në këtë segment.Inspektime këto të cilat do të vazhdojnë edhe përgjatë ditëve në vijim”, thuhet në njoftim.
