Një ish nëpunës i shtetit është vënë në pranga nga policia e Shkodrës pasi akuzohet për shpërdorim detyre. Mësohet se Tomë Shyti, 56 vjeç, është dënuar nga Gjykata e Shkodrës me dy vjet heqje liri për falsifikim dokumentesh. Nga Seksioni për Hetimin e Krimit Ekonomiko-Financiar, të DVP Shkodër, pas një pune të mirëorganizuar u kap dhe u ndalua shtetasi në kërkim, Tomë Shyti, 56 vjeç, banues në fshatin Theth, Shkodër.
PSE AKUZOHET
Me kërkesë të Prokurorisë së Shkodrës, gjykata ka vendosur sekuestro preventive për rreth 41.500 m2 tokë në zonën turistike të Thethit, e dyshuar si e regjistruar në emër të disa shtetasve të ndryshëm, në bazë të dokumenteve të falsifikuar, të përpiluar nga ish-kryetari i Komunës Shalë (Theth), Dedë Tonaj, në bashkëpunim me ish-vartësit e tij, Tom Shyti dhe Gjovalin Lokthi. Prokuroria e Shkodrës është në përfundim të hetimit për veprën penale të “Shpërdorimit të detyrës” për tre ish-zyrtarët, ndërkohë që ka marrë lejen nga gjykata për caktimin e masës së sekuestro për pronat e shpërndara prej tyre, në bazë të procedurave fiktive dhe jo-ligjore.
