Egland Rexha, prej katër vitesh gjatë sezonit turistik punon si vrojtues plazhi në Velipojë, ndërsa ka treguar detaje nga eksperienca e tij gjatë punës. Çdo ditë, 32-vjeçari është në vijën e parë për të vëzhguar nëse ndonjë pushues ka nevojë për ndihmë, ndonëse ditët e fundit deti ka qenë i qetë.
“Një ditë për një vrojtues plazhi është e qetë, kur është koha e mirë si sot. Këshillojmë njerëzit që të mos shkojnë larg. Kur është flamuri i kuq moti është i keq dhe këshillojmë njerëzit që të mos futen thellë”, -tha i riu për euronews. Eglandi thotë se vëzhguesi është i domosdoshëm përgjatë vijës bregdetare për të dhënë ndihmën e parë.
“Nëse dikush rrezikon të mbytet ne intervenojmë me kolegët, shkojmë bëjmë tërheqjen e personit nga deti, japim ndihmën e parë, marrim ambulancën”, -tha ai. Velipoja ka rreth 65 stacione private plazhi ndërsa vetëm në më pak se gjysmën e tyre vërehet të ketë vrojtues. Në mbi 20 plazhe publike këtë vit, nga bashkia nuk ka punësuar asnjë vrojtues.
Fatmirësisht deri më tani në Velipojë nuk ka pasur asnjë humbje jete në det por mungesa e vrojtuesve e shton jo pak rrezikun për pushuesit.
