Pak ditë më parë, në ABC u njohëm me rastin e familjes Tragjini në fshatin Gështenjas të Pogradecit, të cilët jetojnë në varfëri ekstreme. Artan Tragjini bashkë me të shoqen e dy fëmijët jetojnë në një dhomë në qiell të hapur. Pas thirrjeve që janë bërë në ekranin e ABC ka reaguar fondacioni Kryqi i Kuq, i cili i ka siguruar ushqime për dy muaj. Megjithatë kryefamiljari ka kërkuar punë, duke thënë se bashkia e Pogradecit nuk i ka ndihmuar. Sipas tij, edhe për ndërtimin i kishin lënë në pritje derisa moti të ishte i kthjellët.
“Më kanë sjellë ndihma ushqimore, i falenderoj po unë kam nevojë për punë. Shkova te bashkia dhe thanë do vijnë ta rindërtojnë. Shkoi nusja ime dhe ajo i kishte thënë ik se do ta ndërtojmë kur të hapet koha. Kam një vit që jetoj këtu. Më thanë për një punë, po ishte shumë larg dhe nuk kisha me çfarë të shkoja”, tha Tragjini. Sakaq, vogëlushi i familjes, Arjoli ka bërë një thirrje duke bërë shumë zemra të preken. “Dua një shtëpi, kam shumë ftohtë”, ishin fjalët e vogëlushit.l.k/abcnews.al
