Presidenti francez Emmanuel Macron ka rezultuar pozitiv me Covid-19. Lajmi u bë publik nga zyra e shtypit të Elizesë. “Kjo diagnozë u vendos pas një testi RTPCR të kryer sapo shfaqen simptomat e para,” thuhet në njoftim. “Në përputhje me rregulloret shëndetësore në fuqi të zbatueshme për të gjithë, Presidenti i Republikës do të izolohet për 7 ditë.
Ai do të vazhdojë të punojë dhe do të sigurojë aktivitetet e tij në distancë,” vijoi deklarata. Çdo axhendë e parashikuar për kreun e shtetit që nuk mund të bëhet në distancë në ditët në vijim do të anulohet. Sipas informacioneve paraprake, Presidenti është në gjendje të mirë dhe nuk ka zhvilluar një formë serioze të sëmundjes.
