Princi Harry dhe vëllai i tij William kanë hedhur poshtë zërat se ka pasur një zënkë midis tyre. Duka i Sussex dhe Duka i Cambridge kanë dhënë deklaratën e tyre të parë të përbashkët, që nga e mërkura kur “The Times” publikoi një artikull ku thuhej se Meghan dhe Harry kanë akuzuar William për bullizëm.
Sipas kësaj medie, Meghan i ka thënë bashkëshortit të saj se duhet të largohej nga familja mbretërore, duke fajësuar pjesërisht për këtë kunatin e saj William.
“Nuk po punon për mua”, raportonte “The Times” t’i kishte thënë Meghan bashkëshortit të saj gjatë Krishtlindjeve.
“Pavarësisht mohimeve të qarta, një histori e rreme u përhap në një gazetë në Mbretërinë e Bashkuar sot duke spekuluar për marrëdhëniet midis Dukës së Sussex dhe Dukës së Cambridge. Për dy vëllezër që kujdesen kaq shumë për çështje që lidhen me shëndetin mendor, përdorimi i gjuhës inflamatore në këtë mënyrë është fyese dhe e dëmshme”, thuhet në deklaratën e dy princave.
Harry do të paralajmërohet në mega-samitin e tij të Sandringhamit se ka pengesa të jashtëzakonshme që do të duhen muaj për tu kapërcyer përpara se të mund të lërë pozicionin e tij dhe të transferohet në Kanada .
