Ambasadorja e SHBA-së në Tiranë Yuri Kim, gjatë ceremonisë së nisjes së zbatimit të projektit për transformimin e Piramidës, u shpreh se, “është vërtetë një kënaqësi shumë e madhe dhe ndërsa kisha mundësi të bëja këtë ecje të shkurtër ishte e pamundur të mos mendoja se historia është një gjë kureshtare”.
“Ne shpesh flasim për rrjedhën e historisë sikur ngjarjet të kenë një jetë dhe vullnet të tyre dhe njerëzit të mbarten në rrjedhën e saj. Nga ana tjetër flasim gjithashtu për historinë në krijim e sipër që nënkupton një krijues, dhe historia në krijim e sipër është ajo që na bashkon sot”, tha ajo.
Në vijim, ambasadorja Kim shtoi se, “siç e dimë të gjithë, piramida e Tiranës u hap në vitin 1988 si muzeu i Enver Hoxhës, një festim cinik i diktaturës”.
“Dhe si vetë diktatori dukej se kjo godinë dukej t’u thoshte njerëzve që njerëzit janë subjekte pasivë në rrjedhën e një historie brutale në të cilën nuk kishin asnjë rol”, tha ajo.
Po ashtu, Kim tha se, “siç e dëshmoi populli shqiptar në 91-shin dhe siç e tregojnë ata dhe sot, në fakt ata kishin një rol. Populli shqiptar e shpalli se historia e Shqipërisë është duke u bërë dhe se populli shqiptar është krijuesi i saj”.
Ajo shtoi se, “pak më shumë se një vit më parë Fondacioni Shqiptaro-Amerikan për Zhvillim, Vodafon dhe bashkia e Tiranës ranë dakord të krijonin një hapësirë për të nxitur novacionin e teknologjisë. Bashkëpunimi i tyre po shndërrohet tashmë në atë vizion dhe po e shndërron në një realitet. Pres me kënaqësi të shoh këtë partneritet midis qeverisë dhe biznesit, midis amerikanëve dhe shqiptarëve që ta shndërrojnë këtë piramidë nga një simbol të të kaluarës së errët, në inkubator për të ardhmen e ndritur të Shqipërisë, një të ardhme, ku më të mirët dhe më të shkëlqyerit e Shqipërisë të mësojnë, të jenë krijuesit e vetë historisë së tyre”.
