Është publikuar raporti origjinal i ekspertizës së mjekëve zviceranë për rastin e Astrit Deharit.
Avokati Tomë Gashi ka bërë publik raportin në gjuhën origjinale ku tregohet se si është zhvilluar hetimi dhe si kanë arritur në përfundim se rasti i tij duhet të kthehet në hetim.
Në pikën 2 të këtij raporti, më saktësisht tek kampionet e realizuara mbi orën e markës “MOWATCH”, thuhet se kanë vërejtur se ka ADN të një personi tjetër, shkruan Gazeta Ekspress.
“Kampionet e realizuara mbi faqen e jashtme të rripit dhe kuadrit të orës së markës “MOWATCH”(19-T034971d1) ka mundësuar të kemi një profil të ADN-së së përzier.
Ai është i përbërë nga një fraksion madhor i pjesshëm (14/16 lokuese) me prejardhje nga një person i panjohur që ne e kemi emëruar H1. Ky profil i ADN-së është ndryshe nga ai i z. Dehari ASTRIT (#A.D), një fraksion minor në veçanti është i pranishëm.
Ky megjithatë nuk është i realizueshëm. Kampionet e kryer mbi faqen e brendshme të rripit dhe kuadrit të orës (19-T03497d2) nuk na ka mundësuar të kemi një profil të realizueshëm të ADN-së”, thuhet në raport.
Si përfundim në këtë raport është thënë se nga gjurmët që kanë reaguar negativisht në këtë test, vetëm një profil i ADN-së është fituar ndërsa gjurmët tjera nuk janë analizuar fare.
“Përqindja e ulët e sukseseve të fituara për këto gjurmë sugjeron se procedura analitike e përdorur nga “Agjencia Kosovare e Forenzikës” nuk ishin shumë të ndjeshme. Si ilustrim kjo agjenci nuk i ka analizuar kampionet e realizuara mbi orën e z.Astrit Dehari të cilët, sipas tyre, përmbanin shumë pak ADN.
Ne ia kemi dalë të fitojmë një profil të ADN-së që kishte prejardhje nga një njeri i panjohur i emëruar H1 përmes një kampioni të ri të realizuar mbi të njëjtën orë. Kjo sugjeron se profilet e ADN-ve potencialisht do të mund të merreshin për gjurmët tjera të cilat nuk janë analizuar nga “Agjencia Kosovare e Forenzikës”, thuhet më tutje.
Në raport është thënë se megjithatë është e rëndësishme të saktësohet se nuk është e mundur të përcaktohet kur dhe si një ADN është vendosur mbi një bartës.
Më tej shkruhet se ata kanë analizuar shishen e plastikës, thonjtë e dy duarve dhe një orë të tij.
Nga ana tjetër Sanije Rexha, gruaja e ish-luftëtarit të UÇK-së, Abedin Rexha, i njohur me nofkën Sandokani, njoftoi se do të kërkonte ndihmë nga Instituti i Mjekësisë Ligjore në Lozanë ku u krye ekspertiza për ish-aktivistin e VV-së, Astrit Dehari.
Përmes një statusi në Facebook, Rexha shkruan se qeveria e Zvicrës me institucionet e saj ka fituar besimin e qytetarëve të Kosovës.
“Po ashtu, duke parë se Institucioni vendor i Rep.së Kosovës, politika dhe Eulexi e kanë përbuzur dhe diskriminuar skajsmërisht dhe me dyshimin që ka ndërhyrje në trupin e tij, për ta fshehur krimin e rastit do të kërkojmë të bëhet edhe analiza e ADN-ës. Me respekt, Sanije Rexha,”– ka deklaruar ajo.
/Gazeta Express
