Ditët e nxehta të verës shumë prej turistëve kanë zgjedhur ti kalojnë në rulot, me familjen apo miqtë e tyre. Ata shprehen se në Shqipëri nuk i ka sjellë vetëm natyra e bukur por edhe çmimet e ulta. Shumë prej turistëve kryesisht të huaj, nuk kanë preferuar luksin e hoteleve për të kaluar pushimet e verës, por kanë zgjedhur modestinë e makinave të kampingut. Në kampin e Radhimës, bukuritë e plazhit kanë tërhequr turistë nga shumë shtete të Europës.
“Vij nga Holanda. Jam me familjen, në Shqipëri ka njerëz miqësor ndërsa natyra është e bukur”.
“Vij nga Berlini. Deti është i bukur. Vlorën e zbulova rastësisht teksa po udhëtoja drejt jugut, kam qenë edhe në veri, kam qëndruar gjatë”.
Të impresionuar nga mikpritja, thonë se jo vetëm që do të rikthehen por do ta sugjerojnë Shqipërinë edhe tek miqtë e tyre.
“Njerëzit janë mikpritës, kampi është i bukur pasi është afër plazhit. Për Shqipërinë kemi lexuar në internet, por edhe nga miqtë shqiptar me të cilët u këshilluam para se të vinim, më vonë do të shkojnë në Berat si dhe Tiranë”. “Është një destinacion për tu zbuluar. Është hera e parë dhe me shumë siguri do të kthehem sërish”. Nuk mungojnë as emigrantët shqiptarë të cilët çdo verë i qëndrojnë besnik plazheve të jugut. “Vij nga Maqedonia, jam nga Tetova. Jemi të kënaqur shumë, restorante shumë të bukur, ushqimi është shumë i mirë.” “Vlora mu duk më mirë, edhe më mirë se Durrësi.” Përveç natyrës thonë se në Shqipëri i kanë sjellë edhe çmimet e favorshme, të ulta krahasuar me vendet nga vijnë.
