Baronët e drogës ranë. Përpjekjet e policisë zvicerane mundësuan kapjen e drejtuesve të bandës, si dhe qindra kilogramëve kokainë pluhur
Në fotografi të ndryshme, shihen duke pozuar në qytetet më të mëdha evropiane, shpesh para makinave luksoze, ndonjëherë me t-shirt-e me fytyrën e Pablo Escobar-it ose duke mbajtur mitraloza në shpinë. Njëri prej tyre kishte guxuar edhe të quante qenin e tij “Toto Riina”, në nderim të “Capo dei capi”, kreut më të egër të mafias siciliane.
Por të gjitha këto i kanë marrë fund. Këta baronë droge, me bazë në Granges, u arrestuan në Zvicër dhe Shqipëri, falë përpjekjeve të përbashkëta të disa policive zvicerane dhe ndërkombëtare. Gjatë bastisjeve, hetuesit sekuestruan rreth 50.000 franga cash, armë zjarri dhe, mbi të gjitha, pothuajse 300 kilogramë kokainë. Droga ishte fshehur në një kontejner që zbarkoi në portin e Hamburgut, Gjermani. Ngarkesa vinte nga Amerika e Jugut dhe ishte destinuar për shpërndarje në të katër anët e Evropës.
Për të kryer shpërndarjet, rrjeti rekrutonte shqiptarë të rinj, rreth të 20-ave, të varfër dhe pa precedentë penalë. Ata vinin me autobus në Zvicër dhe akomodoheshin në apartamente.
Këta të rinj merrnin udhëzime përmes mesazheve dhe “punonin” për disa muaj para se të ktheheshin në vendet e tyre. Në total, rreth gjashtëdhjetë prej këtyre “mushkave të drogës” u ndaluan nga autoritetet zvicerane, por asnjëri nuk tregoi asgjë gjatë marrjes në pyetje. Ata ishin vetëm pionë të lehtë për t’u zëvendësuar.
Tani janë hapur procedura kundër një duzine drejtuesish, nga të cilët dy janë dënuar tashmë. Por ai që sapo ra, është kreu i bandës. Ky shqiptar 37-vjeçar u arrestua në Tiranë. Fillimisht vepronte nga Granges, por u largua në Shqipëri pas bastisjeve të para, që datojnë që nga viti 2021. Autoritetet shqiptare e kanë ekstraduar së fundmi në Zvicër. Përveç menaxhimit të një trafiku të madh droge, ai dyshohet se ka falsifikuar pasaporta për “mushkat e drogës” dhe bashkëpunëtorët e tij.
Fitimet e trafikut depozitoheshin në një agjenci udhëtimesh në Lucern, para se të dërgoheshin pjesërisht në Shqipëri. E njëjta agjenci përdorej më parë edhe nga një tjetër klan ballkanik për pastrimin e parave. Prokurori që mban çështjen thekson: “Është më lehtë të luftohen këto struktura ndërsa veprojnë në mënyrë të paligjshme. Më vonë, kur krijojnë biznese dhe përdorin njerëz të besuar për një kontabilitet dukshëm të pastër, sektori ekonomik i paligjshëm dhe ai i ligjshëm ndërthuren, dhe bëhet më e vështirë t’i ndalosh”.
