Një vit nga hyrja në fuqi e vendimit për ndalimin e qeseve plastike, kryeministri Edi Rama shkruan se është shënuar rezultat pozitiv, pasi sipas tij ka 50% më pak prodhim të tyre.

“Me hyrjen në fuqi të Vendimit të Qeverisë për “Qeset Plastike” është shënuar një rezultat shumë pozitiv: 50% më pak prodhim të qeseve plastike” thotë ai.

Kreu i qeverisë vendos edhe objektivin. “Objektivi yne: Qershor 2020 afati final i nxjerrjes së qeseve plastike nga qarkullimi, pas daljes së Ligjit për Ndalimin e Hyrjes, Prodhimit dhe Përdorimit të Qeseve Plastike në Shqipëri‘.

Sfida e radhës janë shishet, golat dhe pjatat plastike. “Dhjetor 2020 afati final i nxjerrjes së shisheve, gotave e pjatave plastike nga qarkullimi, pas daljes së të njëjtit ligj.

Eshtë një objektiv shumë ambicioz, por Shqipëria Turistike që duam nuk mund të bashkëjetojë me qeset e me shishet plastike, prandaj do të vazhdojmë drejt për të realizuar objektivin, duke hyrë në një proces intensiv konsultimi publike” përfundon Rama.

Sipas vendimit të qeverisë për ndalimin e përdorimit të qeseve plastike, në treg lejohen vetëm qeset e riciklueshme të cilat u jepen blerësve kundrejt pagesës 5 deri në 10 lekë.

Për të gjitha subjektet nga supermarketet e mëdha e deri të tregtarët e vegjël që nuk përdorin qese të riciklueshme, gjobat do të variojnë nga 100 mijë deri në 150 mijë lekë.