Kryeministri Edi Rama ishte i pranishëm në një nga familjet e prekura nga tërmeti në Thumanë. Ai takoi kryefamiljarin Sokol Mesi, i cili tashmë është strehuar duke përfituar nga bonusi i qirasë. Gjatë bisedës me të, Rama tha se në fillim të muajit maj do të fillojë puna për rindërtimin.
Edi Rama: Do zhvillojmë takime që të tregojmë projektet, të flasim për procesin e rindërtimit. Duhet durim. Kemi bërë maksimumin për të bërë sa më shpejt shumë gjëra bashkë. Javën e ardhshme do fillojmë me garën ndërkombëtare. Kemi bërë maksimumin për të bërë shumë gjëra bashkë. Nga fillimi i majit do jemi në kantier. Ndeshje të tilla nuk i kam problem. Po çfarë t`u bëj ndeshjeve që nuk kanë rregulla dhe arbitra. Kjo është kollaj. Vitin e ri do ta bëjmë te shtëpia e re.
Ndërkohë, vetë banori u shpreh se tërmetin e përjetuan me vështirësi.
Sokol Mesi: Kur ke ardhur në momentin e rrezikut të kena prit. Dhe tani të presim për të mira. Mbas jetës shtëpia është e rëndësishme. E kemi përjetuar me vështirësi, por e kemi mbajtur veten.
Kryebashkiaku i Krujës, Artur Bushi tha se në Thumanë përfitojnë rreth 1800 familje nga bonusi i qirasë. Ai gjithashtu konfirmoi se një pjesë e familjeve janë strehuar te banorë të tjerë, ndërsa bonusin e përdorin për jetesë.
Artur Bushi: Këtu në Thumanë shumica e njerëzve që nuk u prekën nga tërmeti u kanë hapur shtëpitë banorëve të tjerë. Ka pasur solidaritet. Ndërkohë, bonusin e marin dhe e përdorin për jetesë. Janë gati 1800 familje që përfitojnë nga skema e bonusit të qirasë.
