Kryeministri Edi Rama nga Vlora tha se duan që të rilindin industrinë e mbrojtjes dhe atë të prodhimit ushtarak për ta shndërruar në motor të ri të zhvillimit ekonomik.
Në një aktivitet ku u nënshkrua marrëveshja strategjike për aviacionin dhe mbrojtjen ajrore shqiptare, Rama deklaroi se kjo është një hap i rëndësishëm në funksion të mbështetjes qoftë të aviacionit civil qoftë Forcave tona të Armatosura Ajrore me një kapital njerëzor të kualifikuar.
“Jemi në një proces diskutimesh në disa drejtime, por thelbi është që të rilindim industrinë tonë të të mbrojtjes dhe industrinë tonë të prodhimit ushtarak. Jemi optimist, kemi partnerët dhe aleatët e duhur që janë lider në këtë fushë, jo vetëm Izraelin, por edhe SHBA dhe shtete të tjera të BE dhe Turqinë që është aleat strategjik i ynë.
Ajo që është e rëndësishme është rritja e buxhetit të mbrojtjes që ne e kemi fokusuar tek rritja e mbështetjes për FA, do ta vazhdojmë duke shtuar mbështetjen për ushtarakët tanë në të gjitha aspektet, deri tek strehimi. Nga ana tjetër do ta fokusojmë tek prodhimi, tek ngritja e një bazë të mirëfilltë prodhuese në Shqipëri për të vënë në dispozicion të FA mjetet më të sofistikuara të kohës, por edhe duke eksportuar.
Do bëjmë dy gjëra, duke krijuar një bazë industriale ekselence dhe duke i krijuar vajzave dhe djemve të këtij vendi jo vetëm të qëndrojnë këtu për punë të mirëpaguara, por edhe të kthehen këtu. E dyta duke përdorur industrinë ushtarake si një motor të ri të rritjes ekonomike. Jam besimplote se kjo marrëveshje e nënshkruar sot do të në japë në 4-5 vitet e ardhshme mundësinë që të jemi krenar që jemi këtu sot“, tha Rama.
