Gjatë bashkëbisedimit me qytetarët në Korçë, kryeministri Edi Rama tha se proceset e shtetbërjes ende sot duan kohën e tyre duke shtuar se ndër vite është humbur një gjeneratë sepse nuk janë bërë gjërat e duhura.
Në fjalën e tij, Rama teksa ka folur për tregtimin e mishit deklaroi se në 3-4 vitet e ardhshme është e mundur që të ketë dalje në treg. Kryeministri tha se nuk kemi pse presim deri sa të na hapë dyert BE-ja pasi kemi tregje të tjera alternative, siç është Turqia. “Ne nuk jemi të detyruar të presim tregun e BE domosdoshmërisht, sepse ka tregje të tjera. Është e mundur që produktet tona të mishit të dalin në tregje të mëdha në Lindje, që nga Turqia në Lindjen e Mesme,” u shpreh ai.
Pjesë nga fjala e kryeministrit Rama: “Kemi humbur një gjeneratë, sepse nuk kemi bërë gjërat e duhur në vite. Shumë gjëra që i kemi bërë ne në këto 7 vite, duheshin bërë 17 vite më parë, dhe nuk do të ishim në këtë fazë, por nuk ka një rrugë për t’i rënë shkurt. Madje, rruga për t’i rënë shkurt është tentuar disa herë dhe ka dalë më gjatë. Është njësoj si rruga e skemave piramidale.
Ndaj na duhet një durim i madh për të kuptuar që proceset e shtetbërjes në të gjitha hallkat dhe ngritjes së zinxhirit të institucioneve, që të bëjnë punën e tyre, janë procese që kërkojnë kohën e tyre. Nuk është optimiste që të themi se në 3-4 vitet e ardhshme është e mundur që ne të kemi dalje në treg, por ne nuk jemi të detyruar të presim tregun e BE domosdoshmërisht, sepse ka tregje të tjera. Është e mundur që produktet tona të mishit të dalin në tregje të mëdha në Lindje, që nga Turqia në Lindjen e Mesme, e deri tutje.
Kështu që, besoj se ka shumë hapësirë, që puna juaj në këtë sektor, të jetë një revolucion. Janë ndërtuar shembujt që tregojnë se nëse bën gjërat e duhura këtu bën sukses, si një aktor në një treg të madh. Nëse pret që shteti t’i bëjë të gjitha, nuk bën dot sukses, ka marrë fund”, u shpreh kryeministri.
