Kryeministri Edi Rama është zhvendosur në fundjavë në Vlorë, teksa mesditën e sotme zhvilloi një takim me drejtorët në nivel qarku të qytetit bregdetar për të diskutuar problemet në sezonin turistik. Takimi u zhvillua në Zvërnec, në zonën ku një ditë më parë pati tensione te IKM me bizneset për shembjet. Kryeministri Rama pritet që të takojë edhe disa nga operatorët turistikë, të cilët kërkojnë shtyrjen e aksionit për në vjeshtë.
Bëhet fjalë për bare dhe restorante të cilin marrin leje shfrytëzimi çdo vit që nga 2011, madje këtë vit edhe nga e-Albania, por IKMT-ja nxori fadromat në terren për t’i shembur, në mes të sezonit turistik.
Kjo ndërhyrje u cilësua shumë e padrejtë nga pronarët, të cilët kërkojnë minimalisht që shembja e tyre të bëhet pasi të përfundojë sezoni, për shkak se kanë qenë të mbyllur përgjatë 3 muajve të pandemisë, por edhe për faktin se kanë kryer investime. Sipas tyre, IKMT-ja u ka lënë afat deri të hënën, por nuk ua ka dorëzuar një gjë të tillë me shkrim.
