Shpresa Leka, së bashku me dy vajzat e saj të mitura kanë përjetuar një traumë me humbjen e kryefamiljarit dhe si pasojë të treja vuajnë nga probleme të shëndetit mendor. Vendi ku jetojnë dhe problemet shëndetësore e penalizojnë Shpresën, që të punojë për të siguruar jetesën dhe të vetmet të ardhura me të cilat kjo familje kalon muajin janë 30 mijë lekë të vjetra, që marrin nga ndihma sociale.
“Kanë humbur babain e tyre dhe me 30 mijë lekë që marrin nuk mundëm të kalonin muajin, Kanë nevojë për dikë që t’i shërbejë se janë të treja me probleme. Që pas vdekjes së bashkëshortit Shpresa kaloi në depresion” Afrimi i festave të fundvitit e gjen këtë familje në një mjerim të thellë. Irena Gjergo shprehet se e vetme e ka të pamundur që t’i ndihmojë, por nëse të gjithë bëhemi bashkë mund t’i ndihmojmë që edhe ato të ndjejnë si të gjithë ngrohtësi festive. “Kanë nevojë për shumë gjëra nuk mund t’i ndihmoj vetem unë por të bëhemi të gjithe bashkë”
Irena Gjergo është një emigrante nga USA, e cila një vit më parë vendosi të kthehej në vendlindjen e saj dhe të vizitojë fshatin Leminot të Korçës, për të parë se si jetonin banorët e asaj zone. Rasti i familjes Leka asaj i mbeti thellë në mendje dhe sot një vit më pas, Irena denoncon live në emision vështirësitë dhe vuajtjet që kjo familje po kalon. “Është një histori e vështirë, vjet u ktheva në Shqipëri dhe thashë të shoh si jetonin në atë vend malor dhe u shokova nga jetesa e kësaj familje. Janë në një gjendje tepër të vështirë dhe më vjen shumë keq, ato hanë edhe bar se nuk kanë ushqim çfarë të hanë”/ Shqiptarja
