Kryeministri Edi Rama ishte sot në kantierin e Rindërtimit të lagjes së re qendrore të Vorës, ku tanimë është realizuar infrastruktura nëntokësore dhe në kopshtin “Muçaj”, që do të hapë dyert për fëmijët në 26 nëntor.
Rama tha se “në një hapësirë afro 10 hektarë, është parashikuar qendra e Vorës e cila do të rilindë me standarde e me një pamje krejt të re”.
“404 familjet që humbën apartamentet dhe shtëpitë natën e 26 nëntorit e sot vazhdojnë të jetojnë me qira të paguara nga qeveria deri në përfundim të rindërtimit, do të kthehen në një shtëpi më të bukur e më të fortë dhe në një lagje shumë herë më të bukur e më miqësore për të gjitha moshat”, tha ai.
Kryeministri pa nga afër edhe godinën e re të kopshtit të Vorës, e cila po ndërtohet me standarde bashkëkohore.
Ndërkohë ministri i Rindërtimit, Arben Ahmetaj informoi se “këtë javë do të shemben të gjitha pallatet që janë vlerësuar për t’u rrëzuar dhe aty fillon edhe bulevardi që vendos edhe profilin e ri të Vorës”.
“Sot FSHZH do të nxjerrë edhe fituesit për 2 pallatet në Durrës. Zyrtarisht që nga sot do të kemi një bashkim operatorësh që do të dali nga procesi dhe do të fillojë punë menjëherë javës së vjen”, tha Ahmetaj.Atsh
