Dy ditë pas rrëshqitjes së dherave në Japoni, në qytetin e Atami, janë raportuar 3 të vdekur dhe 20 të zhdukur. Zyrtarët lokalë janë shprehur se nuk kanë qenë ende në gjendje të përcaktojnë fatin e dhjetëra të tjerëve në zonë në kohën e katastrofës.
“Për momentin ne kemi konfirmuar që 102 njerëz janë të sigurt dhe të shëndoshë, ndërsa ne vazhdojmë të verifikojmë sigurinë e 113 të tjerëve nga 215 banorët të cilët ishin me sa duket në zonën e goditur nga rrëshqitja e tokës”, tha Yuki Sugiyama, një zyrtar lokal.
Ndërkohë, kryetari i bashkisë së Atami, Sakae Saito në një konferencë për mediat tha se numri zyrtar i rreth njëzet personave të zhdukur është “një numër i bazuar në informacionin që kishte arritur në komunë në momentin që kishte ndodhur katastrofa dhe për këtë arsye i nënshtrohet rishikimit”.
