Shqetësim për Policinë e Shtetit janë aksidentet rrugore, që vijojnë të mbeten shkaktar kryesor i humbjes së jetës në rrugë. Siguria rrugore bëri bashkë ministrin e Brendshëm, Sandër Lleshaj, ministren e Infrastrukturës, Belinda Ballu, kreun e Policisë së Shtetit, Ardi Veliu si edhe kryebashkiakë e ekspertë të fushës.

Policia ka kërkuar ndryshimin e masave ndaj drejtuesve të mjeteve që qarkullojnë duke shkelur rregullat e qarkullimit në parakalime apo duke folur në telefon. Shkak për këtë është bërë numri i aksidenteve që janë regjistruar për këto raste.

Ministri i Brendshëm, Sandër Lleshaj ka tërhequr vëmendjen për shifrat e larta të personave që humbën jetën në rrugë. ”Vetëm në 2019 kemi humbur jetën e 227 qytetarëve shqiptarë në rrugët e vendit, shifër pothuajse 5 herë më e lartë se shifra e të vrarëve që shkakton krimi në Shqipëri. Gjithë kriminaliteti në vend prodhon rreth 50 të vrarë në vit, edhe kjo me rënie drastike krahasuar me të kaluarën”.

Pas konsultimeve pritet që gjobat të jenë edhe më të larta, duke përfshirë dhe kërkesën që një drejtues të ketë mundësinë e vetëm një këshillimi.