Një sherr masiv me sende të forta dhe thika mes disa të rinjë është regjistruar këtë të diel në Vlorë, ku për pasojë 4 prej tyre kanë mbetur të plagosur. Ngjarja ka ndodhur rreth orës 14:45, në një lavazho në lagjen “Hajro Çakërri”.
Autoritetet policore raportojnë se gjatë konfliktit, shtetasi K. H., rreth 20 vjeç, ka mbetur i plagosur me thikë dhe aktualisht ndodhet në spital, jashtë rrezikut për jetën.
Ndërkohë, janë plagosur me sende të forta edhe shtetasit R. Y., 30 vjeç, R. M., 19 vjeç, dhe D. I., 32 vjeç. Raportohet se pasi kanë marrë ndihmën mjekësore në spital, ata janë shoqëruar në komisariat për t’u marrë në pyetje lidhur me rrethanat e konfliktit.
Blutë e Vlorës raportojnë dhe se nga veprimet e para hetimore është identifikuar dhe po punohet për kapjen e autorit të dyshuar të plagosjes me thikë, shtetasin A. B., 25 vjeç.
Policia thotë se grupi hetimor vijon punën për zbardhjen e plotë të ngjarjes dhe identifikimin e çdo shtetasi tjetër të përfshirë në këtë konflikt.
