Dy elektricistë janë plagosur gjatë ushtrimit të detyrës dje në Lezhë, pasi ishin duke riparuar defektin në një kabinë elektrike.
Ngjarja ka ndodhur në zonën e Ishull-Lezhës dhe policia konfirmoi incidentin, duke sqaruar se gjendja shëndetësore e punonjësve të elektrikut ndodhet jashtë rrezikut për jetën.
“Gjatë punës për riparimin e një defekti në një kabinë elektrike, në fshatin Ishull Lezhë, janë dëmtuar 2 elektricistë, shtetasit E. A., 63 vjeç dhe Gj. M., 58 vjeç, të cilët janë jashtë rrezikut për jetën”, bëri me dije policia vendore.
Po kështu dyshohet se si pasojë e një defekti, ka rënë zjarr në kabinën elektrike të një pallati në Shëngjin. Si pasojë pati vetëm dëme materiale.
Policia dhe Prokuroria po punojnë për zbardhjen e ngjarjeve të ndodhura.
