Dafina Zeqiri ka folur gjithmonë për lidhjen e fortë që ka me mamanë e saj. Këngëtarja nuk i ka kursyer asnjëherë dedikimet publike për personin që i dha jetën dhe e rriti me shumë dashuri, e cila ka qenë gjithashtu një ndër suportueset më të mëdha përgjatë karrierës së saj muzikore.

Së fundmi, këngëtarja e hitit “Zili Zili” ka publikuar një fotografi të së ëmës, krahas së cilës ka shkruar disa fjalë të ndjera. “E mbijetuar, luftëtare, ëngjëll. Gruas që më mësoi të ngrihem në këmbë dhe të bëj mirë sado mizorë që të jenë disa njerëz. Karma do të gjejë gjithmonë një mënyrë se si t’i përgjigjet problemeve të tyre”, ka shkruar Dafina.

Kujtojmë që Dafina ka treguar më parë se albumi “Dafinë Moj” ka një lidhje të veçantë me nënën e saj si dhe do t’i realizojë asaj një dëshirë të mbetur në sirtar, që lidhet me muzikën.

“Meqë ky album është pak a shumë personal për mua kam vendosur që jo vetëm me ia lënë emrin ‘Dafinë Moj’, por tash po ua zbuloj surprizën që ka me qenë edhe mami im pjesë e albumit, dhe mami do ta këndojë atë për mua”, ka thënë Zeqiri.