Në programin “Dola te Ola” e ftuara e dytë për këtë javë ishte këngëtarja e njohur Kamela Islamaj, e cila foli për jetën e saj personale dhe profesionale.
Kamela ka nisur mësimet e pianos në moshën 5-vjeçare, dhe në program rrëfeu se kur ka bërë konkursin në shkollën “Tefta Tashko Koço” në fillim e futën të studionte për violinë, ku qëndroi vetëm dy javë dhe më pas kaloi në piano. Ajo tregoi se fëmijëria e saj ka qenë ndryshe nga ajo e moshatarëve, pasi nuk ka mundur të luajë shumë me ta se duhet të kujdesej për duart.
Kënga në jetën e Kamelës ka ardhur me vonë dhe ajo rrëfeu se ka qenë i ati ai që e ka shtyrë drejt saj. Këngëtarja tha se ëndrra e saj e hershme ka qenë që të këndojë teksa luan në piano dhe për këtë gjë ajo po vijon të punojë dhe shumë shpejt do të vijë me disa projekte të reja muzikore.
Kamela foli në program edhe për partnerin e saj italian, me të cilin ajo prej rreth 7 vitesh bashkëjeton. Këngëtarja zbuloi se ata janë njohur në një rreth miqsh të përbashkët.
Gjatë programit Kamela mori edhe një videomesazh shumë të bukur nga mikesha e saj e ngushtë Orgesa Zaimi. Mbrëmja në “Dola te Ola” u mbyll me këngën “Arapkë moj, syzezë moj” interpretuar nga Kamela Islamaj dhe vëllezërit korçarë, Endri dhe Stefi Prifti, duke na dhuruar një moment të bukur televiziv në këto ditë të trishtueshme që po kalojmë.
