Tre shqiptarë në Bedford, Angli, janë shpallur fajtorë për rrëmbimin dhe përdhunimin e një 23-vjeçareje në shtator të vitit të kaluar. Ngjarja ka ndodhur saktësisht më 4 shtator, pasi e reja kishte dalë natën me disa miq të saj. Vullnet Haka, 33 vjeç, dhe Ibrahim Bezati 36 vjeç, të dy nga Bedford dhe Gemti Hyka nga Cambridge Road 31-vjeç, akuzohen për rrëmbim dhe për përdhunim ndaj 23-vjeçares. Ata u shpallën fajtorë sot pas një gjyqi tre javor, por ende nuk është caktuar data për dënimin e tyre.
Gjykata e Luton Crown dëgjoi se si e reja doli me miqtë e saj në qendër të qytetit Bedford në një klub nate. Hyka iu afrua aty, por u largua me një mik pa rënë në sy. Më vonë Hyka iu afrua sërish vajzës pasi ajo ishte ndarë nga shoqja e saj. Ai më pas e rrëmbeu atë dhe e çoi në garazhin e Newnham Avenue BP me makinën e tij.
Vajza ka tentuar të sinjalizojë për ndihmë, por pa sukses. Hyka më pas e çoi në një pronë në Kempston ku po prisnin Bezati dhe Haka. Policia thotë se viktima më pas u detyrua të merrte kokainë dhe u përdhunua nga tre shqiptarët. Ajo përfundimisht arriti të arratisej dhe gjeti një kalimtar i cili e ndihmoi të kontaktonte me policinë. Burimi: Daily Mail
