Mimoza Haska me origjinë nga Shqipëria, ka fituar garën për stilimin e fustanit të nusërisë me detaje të ndërlikuara dhe dizajn origjinal, të hënën që lam pas në SHBA, shkruan Gazeta Metro.
Për krijimin e këtij fustani, asaj i duhej të përdorte 48 copa prej letrave higjienike dhe ka shpenzuar rreth 400 orë që ta përfundonte atë. “Veshja është thurur me grep. Linjat horizontale dhe vertikale janë krijuar falë grepit”, ka thënë ajo.
Mimoza kishte thurur edhe trëndafila me grep në këtë fustan, detaj ky i cili i dha një pamje romantike atij. “Unë jam gjithmonë pas stilit special dhe unik, shumë klasik. Kjo nuk është një ide e zakontë. Është dicka që i përshtatet syrit dhe duket mirë”, shtoi Haska. Mimoza e cila jeton prej vitesh në Surfside Beach të Karolinës së Jugut, tregoi se grepin mësoi ta përdorte nga nëna e saj. Ky është edicioni i 15-të i këtij konkursi, në të cilin nuk lejohen kopsat, zingjirët dhe gjëra të tilla, ndërsa, stilistët lejohen të përdorin vetëm ngjitës, letër kasele, gjilpërë dhe fije.
