Rritja e rasteve me koronavirus në vend, pasuar në 24 orët e fundit edhe me dy viktima, është apel i fortë për të gjithë qytetarët për shumë kujdes, në mbrojtje të shëndetit të secilit dhe njerëzve që na rrethojnë. Ministria e Shëndetësisë, ka bërë me dije sot se situata po pasohet me vijim të shtrimeve të pacienteve në Spitalin Infektiv. “Vijon të ketë shtrime në spitalin infektiv ku aktualisht po trajtohen 84 pacientë, 11 prej tyre janë në terapi intensive, ndërsa 2 janë të intubuar”- njofton Ministria e Shëndetësisë.
Sipas saj, pavarësisht rasteve ditore të identifikuara pozitivë, lajmi i mirë është se në 24 orët e fundit janë shëruar 54 qytetarë, duke e çuar në 1438 numrin e të shëruarve që nga fillimi i epidemisë. Ministria e Shëndetësisë ka theksuar sot se për të katërtën javë të vijimit të epidemisë vazhdon një situatë serioze e rasteve të konfirmuara pozitive me Covid19, e rasteve që kanë kërkuar shtrim në spital apo rasteve në terapi intensive. “Një tjetër trend në rritje janë edhe rastet që kanë pësuar humbje jete. Të gjithë këta indikatorë tregojnë që virusi po vijon me të njëjtin intensitet transmetueshmërie dhe po paraqet raste me shenja klinike”– theksoi Eugena Tonimi nga ISHP. Ajo apeloi qe qytetarët që të mos e ulin vigjilencën dhe të zbatojnë masat e vendosura, të mbajnë maskën kudo ku nuk është e mundur të ruhet distancimi fizik, kurse bizneset të zbatojnë protokollet e miratuara, për të ruajtur punonjësit por edhe qytetarët të cilëve u shërbejnë.
Ndërkohë shpërndarja gjeografike e virusit është më problematike në Tiranë, Shkodër dhe Krujë.
“Shpërndarja gjeografike e rasteve është si vijon: 15 raste në Tiranë, 13 në Krujë, 11 në Shkodër, 7 në Durrës, 4 në Lezhë, nga 3 raste në Kukës, Pukë, 2 në Kurbin, dhe nga 1 rast përkatësisht në Korçë, Elbasan, Vlorë, Berat, Mat, Pogradec”.
Mes personave të infektuar mësohet se është edhe një 56-vjeçar, mjek i repartit të Hematologjisë, i cili është vendosur në intubim tek spitali Infektiv.
COVID-19 – Statistika (29 Qershor 2020)
Testime totale 26663
Raste pozitive 2466
Raste të shëruara 1438
Raste Aktive 970
Humbje jete 58 (Qarku Tiranë 32, Durrës 10, Fier 5, Vlorë 2, Shkodër 7, Kukës 1, Elbasan 1)
Shpërndarja gjeografike e rasteve aktive sipas qarqeve:
Tiranë 358 Durrës 198, Shkodër 155, Vlorë 100, Fier 47, Lezhë 39, Korçë 28, Kukës 18, Elbasan 13, Gjirokastër 7, Berat 6, Dibër 1.
