Koronavirusi ka vënë në shtetrrethim Shqipërinë. Por masave të marra vazhdojnë ti kalojnë klandestinët. 7 sirianë janë kapur në Rrugën e Kombit teksa synonin të shkonin drejt vendeve të BE.
Prej katër ditësh Shqipëria është në karantinë.Shtetrrethimit nuk i kanë shpëtuar 1100 drejtuesit e automjeteve, apo të moshuarit që nuk dorëzohen pa shijuar rrezet e diellit apo lojën me domino.
Dëshira e madhe për të kaluar drejt Europës bën që sirianët të sfidojnë koronavirusin duke kaluar përmes Shqipërisë.
7 shtetas sirianë janë ndaluar në Rrugën e Kombit teksa tentonin të shkonin drejt Kosovës e më tej drejt vendeve të BE.
Të shtatë janë kapur nga policia e Kukësit dhe shoqëruar në ambientet e komisariatit.
Sipas policisë, për shtetasit sirianë pas dhënies së dëshmisë do të përgatitet procedura e transferimit të tyre drejt qendrës pritëse të emigranteve në Babrru të Tiranës.
Ky rast nuk është i pari, pasi në Kukës shikon shpesh grupe të rinjsh nga Siria që kërkojnë të kalojne me çdo kusht në Kosovë, duke shfrytëzuar të gjitha rrugët e mundshme, qofte edhe ato të ndihmës për kalim të paligjshëm.
