Edhe pse skandali me falsifikimin e dokumenteve nga DH Albania hedh dyshime mbi biznesmenin Bashkim Ulaj, ish-kryeministri Berisha ka preferuar që të mos e sulmojë këtë të fundit, duke thënë se përgjegjësi i vetëm për atë që ka ndodhur është Edi Rama.
I pyetur nga gazetari Adi Krasta pse Berisha nuk e përmend kompaninë që është përfshirë në këtë çështje, Berisha tha se ai preferon që të mos sulmojë biznesmenët, të cilët janë ata që i japin zhvillim ekonomisë së një vendi. Ulaj është një nga biznesmenët më të afërt të Berishës, në kohën kur ai ishte në krye të qeverisë shqiptare për 8 vite me radhë.
Krasta: Pse nuk keni folur asnjëherë për Ulajn kohët e fundit, për kompaninë dhe për marrëdhënien e falsifikimit dhe situatën shumë problematike të kompanisë së tij?
Berisha: E para nuk besoj të mos kem folur. E dyta është një ngjarje tepër e shëmtuar dhe di që ka një hetim në Shqipëri dhe në SHBA. Uroj dhe besoj që përgjegjësit e atij mashtrimi të vihen para ligjit. Ndonëse kam bindjen se përgjegjësi kryesor është Edi Rama me Damian Gjiknurin.
Zoti Krasta Shqipëria është sot i vetmi vend në botë që ndërton autostrata me 20 milion euro kilometrin, para pak javësh unë kisha një deputet gjerman nga më të shquarit në Bundestag dhe më tha 2 milion a 2 milion e gjysmë euro kilometri është fare e njohur, dhe këtu është bërë një piramidë e tmerrshme me ndërtimin e tyre. Në këtë kontekst cilido që të jetë përgjegjës uroj të marrë përgjigjen e merituar. A unë kam një gjë tjetër këtu, një dallim nga të tjerët.
Unë ndaj këtyre të pasurve, të cilët sot ndodhen përballë një rrymë kundër tyre, unë nuk qëndroj në atë rrymë. Unë nuk qëndroj në atë rrymë sepse unë kam një besim më të thellë se ata janë gjeneratorët e punësimit dhe zhvillimit të vendit. Njëlloj sikur ata që kanë dhunti poezinë apo të tjerë që kanë dhunti prozën e të tjerë kanë dhunti inxhinierinë, ata kanë dhunti biznesin, kanë dhunti iniciativën e lirë. Ajo dhunti e tyre vërtet i prosperon ata por edhe shoqërinë. Por unë jam për rregulla të barabarta, për konkurrencë të ndershme për zbatim të ligj.
