Dy turistë belgë janë shpëtuar nga policia e Tropojës, pasi humbën rrugën në zonën e Lekbibaj. Mësohet se njëri nga turistët, një 25-vjeçar dëmtoi këmbën duke ngjitur terrenin malor.
Policia ka arritur t’i gjejë, në vendin e quajtur “Stakaj” në Tropojë dhe menjëherë janë transportuar me ambulancë drejt spitalit.
Njoftimi i policisë
Policia e Tropojës u vjen në ndihmë 2 turistëve belg. Dy turistë nga Belgjika, një djalë i moshës 25 vjeç dhe një vajzë 26 vjeçe, duke eksploruar natyrën në zonën e Lekbibaj, kanë humbur rrugën në një zonë të thellë.
Duke u munduar për të dalë nga terreni i vështirë, 25-vjeçari është dëmtuar në këmbë. Turistët kanë njoftuar Policinë dhe kanë kërkuar ndihmë, pasi 25-vjeçari nuk ecte dot për shkak të dëmtimeve që kishte marrë në këmbë.
Menjëherë kanë nisur kërkimet nga shërbimet e Komisariatit të Policisë Tropojë dhe pas disa orë kërkimesh është bërë e mundur gjetja e dy turistëve, në vendin e quajtur “Stakaj”. Turistët janë transportuar me ambulancë në spitalin e Tropojës dhe ndodhen jashtë rrezikut për jetën. Turistët belg kanë falënderuar punonjësit e Policisë që i erdhën në ndihmë.
