Karlo Ançeloti ka treguar se është një mjeshtër i vërtetë, pasi në karrierën e tij ka fituar kampionatin në të pesë ligat kryesore në Europë: Ai është trajneri i parë që e bën një gjë të tillë dhe pas suksesit me Realin sigurisht për të ishte moment feste dhe ishte në qendër të vëmendjes.
Por tekniku ka treguar edhe një anë tjetër të tijën sepse ka ndërprerë në mes një intervistë për të festuar këtë arritje me gruan e tij. Pas fitores 4-0 ndaj Espanjol ku skuadra siguroi titullin, Ançeloti po jepte intervistën e radhës kur aty pranë iu afrua bashkëshortja e tij.
“Prit pak” tha Ançeloti duke lënë intervistën në mes dhe duke shkuar të përqafonte Marian Barrena MekKlei, kanadezen e cila prej vitit 2014 është bashkëshortja e tij.
