Nënkryetari i bashkisë së Tiranës, Arbjan Mazniku ka deklaruar mbrëmjen e së mërkurës se për prishjen e godinës së Teatrit Kombëtar janë ndjekur të gjitha procedurat ligjore dhe godina ishte një bombë më sahat nga ana strukturore.
“Ne kemi ndjekur të gjitha procedurat që ligji parashikon. Së pari ka një VKM nga qeveria që kalon pronën e Teatrit kombëtar në Bashkinë Tiranë dhe është regjistruar në hipotekë si pronë që i përket bashkisë. Më pas ka një këkesë nga ana e bashkisë drejtuar institutit të ndërtimit për gjendjen e objektit. Instituti i ndërtimit i ka kthyer përgjigje bashkisë së Tiranës me pikëvështrimin e vet për gjendjen e objektit. Në bazë të atij dokumenti që i referohet që ka rrezikshmëri nga ana strukturore por edhe për çështjen e zjarrit, dhe që nuk është një objekt që mund te restaurohet, bashkia i ka kërkuar këshillit bashkiak për të marrë një vendim për prishjen. Këshilli bashkiak ka aprovuar për prishjen e objektit, më pas është lëshuar sipas standardeve leja e prishjes që kërkon ligji, më pas Inpektoriati i Mbrojtjes së Territorit që është përgjegjës për për shembjen e objekteve ka marrë veprimet e duhura. Përsa kohë që hapësira dhe procedura ligjore lejojnë veprimin në këtë mënyrë, duhet të vepronim sa më shpejt të ishte e mundur sepse në pikëvështrimin tonë, ajo ndërtesë ishtë një bombë me sahat ana strukturore dhe nuk ishtë më në mbikqyrjen e institucioneve. Pra prej dy vitesh, teatri kombëtar ishte spostuar nga aty. Objekti ishte për t’u prishur, studimet thonë se objekti duhej prishur dhe nuk kishte më asnjë arsye pse të pritej më shumë. 56 anëtare të këshillit bashkiak nga 61 kanë votuar në favor të prishjes”, tha Mazniku.
Ai u shpreh se janë tre arsye pse u zgjodh të mbahej projekti danez, ndërsa shtoi se ky projekt është marrë falas pasi arkitekti danez është paguar nga firma Fusha që u tërhoq, pasi ishte pjesë e marrëveshjes
“Kompania Fusha ka zgjedhur Bjarke Ingels për partner dhe e kanë në kontratat e tyre. Projekti është përmirësuar, është rregulluar, kanë lëvizur disa elementë, por në fundi si pasojë e kostove që u shtuan si pjesë e negociimit me artistët, marrëveshja u prish, pasi nuk i dilte llogaria e saj me kërkesat tona. Projekti na mbeti ne, ishte pjesë e marrëveshjes me firmën Fusha. Ishte marrëveshje e bërë që në fillim. I pari është një projekt nga një arkitekt shumë i mirë, është punuar me artistët duke e sjellë sa më afër kërkesave të tyre në mjediset e teatrit, dhe e treta ne e marrim këtë projekt pa pasur nevojë të paguajmë për të si pjesë e marrëveshjes të bërë nga firma Fusha , kur u mbyll kontrata. Ka qene firma Fusha që ka paguar arkitektin”, tha Mazniku.
Ai theksoi se projekti është në detajimin teknik dhe inxhinierik dhe më pas do të hapet gara për kompanitë duke përfshirë dhe ato ndërkombëtaree për ta ndërtuar.
“Kemi nevojë tani të detajomë projektin në nivel teknik dhe inxhinierik që të marrë formën e tij ekzekutive e të kthehet nga një projekt-koncept në një projekt-zbatimi dhe të fillojmë më prokurimin e projektit. Do të ketë një procedurë e tender publik ndërkombëtar për të zgjedhur një kompani që ta ndërtojë. Është e hapur edhe për firma të huaja”, tha Mazniku.
Sipas tij, teatri i ri do të jetë modern me të gjitha kushtet. “Do të ketë 3 salla, një e madhe me 600 vende dhe dy salla me 300 veta dhe do të ketë një seri të dhomave më të vogla për provat dhe ushtrimet e shfaqjeve. Është bërë një diskutim shumë i gjatë mes artistëve dhe studios që bëri projektin. Është një objekt që synon me shumë krenari të mbajë 100 vitet e ardhshme të teatrit shqiptar”, tha Mazniku z.tosku/j.p/ATSH