Tensione janë shënuar para Kuvendit teksa pritet që të nisë seanca e sotme plenare, ndërsa efektivët e policisë kanë shoqëruar disa persona. Mes të shoqëruarve është edhe eksperti i IT-së dhe aktivisti Gent Progni.
Mësohet se protestuesit kanë qëlluar me vezë disa deputetë socialistë, të cilët ndodheshin në një kafe pranë parlamentit. Në momentin që kanë tentuar të dalin për të hyrë në parlament janë qëlluar me vezë.
Pati edhe konfrontime fizike nga ana e policisë, dhe një ndër protestuesit e shoqëruar ishte i gjakosur në hundë.
Kryetari i lëvizjes “Shqipëria Bëhet”, Adriatik Lapaj, është bashkuar sot me protestuesit para Kuvendit, por prania e tij është pritur me reagime negative.
Sapo është vënë re në zonën e protestës, disa nga pjesëmarrësit i kanë kërkuar që të largohet menjëherë, duke e kundërshtuar praninë e tij në tubim.
Protestuesit kanë vijuar me thirrje drejtuar Lapajt për t’u larguar nga sheshi, ndërsa situata ka mbetur e tensionuar për disa momente.
Pas dy orësh proteste me thirrjet “Rama jepe dorëheqje”, “Arrestoni Ramën” apo “Parlamenti i krimit”, ku u përdorën vezë e miell nga qytetarët dhe gaz lotsjellës nga Policia, organizatorët bënë thirrje me megafon që t’i drejtoheshin me marshim Komisariateve nr. 1 dhe 4 në Tiranë, aty ku mbaheshin të shoqëruar protestuesit.
“Qytetarë, të shkojmë të gjithë te Komisariatet nr. 1 dhe 4 për të liruar çunat tanë, të nxjerrim njerëzit tanë!”, ishte thirrja e një prej aktivistëve.
Shumë nga qytetarët u zhvendosën me marshim drejt Komisariateve, kurse të tjerët qëndruan para Kuvendit, duke u bërë gardh me policinë.
Deri tani raportohet për të paktën 6 protestues të shoqëruar, mes tyre edhe aktivisti Gent Progni.
Ndërkohë që vijojnë edhe tensionet para Parlamentit, ku protestuesit janë vendosur që në orët e para me thirrjet “Parlament i krimit, dorëzoni mandatet”.
Gjatë kësaj proteste ka pasur edhe përplasje me policinë, ndërsa FNSH gjithashtu u vendos në hyrje të Parlamentit.
Protestuesit kanë hedhur vezë me herët në drejtim të automjeteve të disa deputetëve. Ndërkohë revolta vijon para Parlamentit me thirrjet “Arrestoni Ramën”.
