Kuvendi vijon të prodhojë humor dhe çudira. Deputeti Kujtim Gjuzi u përfshi në një debat me Kryetarin e Kuvendit, Gramoz Ruçi.
Gjuzi, që hera herës ka shkaktuar humor dhe ka qenë në vëmendje të memeve në rrjetet sociale, sot kërkoi në sallën e Kuvendit hetimin e kreut të PD-së Lulzim Basha.
“Pse nuk hetohet Lulzim Basha për 4 vrasjet e 21 janarit 2011, se ka qenë ministër i Brendshëm? Po për rrugën e Kombit pse nuk e hetoni? Ju e keni akuzuar dhe pse nuk veproni sot? Apo po bashkëpunoni me të?”, tha Gjuzi.
Duke reaguar ndaj kërkesës së bërë nga deputeti, Ruçi u shpreh “të paktën t’i jesh mirënjohës Lulzim Bashës se të bëri deputet. Z. Basha nuk është deputet dhe s’ke pse e përmend, po shkel procedurën”. Kujtim Gjuzi mori mandatin e deputetit pasi ishte pjesë e listave shumëemërore të PD-së.
