Fieri, qyteti në jugperëndim të vendit, ka hyrë në rrjedhën e shndërrimeve të rëndësishme infrastrukturore.
Me financim të Qeverisë Shqiptare, në zbatim nga Fondi Shqiptar i Zhvillimit përveç qendrës së qytetit dhe rehabilitimit të lumit Gjanicë, një tjetër projekt zhvillimor ka nisur të zbatohet në Fier.
“Konkretisht kanë filluar punimet për “Rikonstruksionin e segmentit të dytë të rrugës “Mujo Ulqinaku” dhe segmentit të parë të rrugës “Jakov Mile”. Aktualisht po kryhen punime në trotuare në të dyja anët e rrugës dhe disiplinimi i ujërave të bardha”, – bën të ditur FSHZH.
Sipas FSHZH-së, ky aks do të plotësojë infrastrukturën e standardizuar të qendrës së qytetit dhe do të lehtësojë dukshëm qarkullimin në këtë pjesë të tij.
Fondi Shqiptar i Zhvillimit shprehet se një sërë ndërhyrjesh të reja po fillojnë “të marrin jetë”, në Shqipëri nga veriu në jug.
Projekte të cilat kanë qëllim primar të jenë në shërbim të komunitetit dhe të mbulojnë një sërë drejtimesh kryesore në vend si: infrastrukturë, turizëm, ekonomi lokale dhe kombëtare, partnership, zhvillim urban dhe përfitime sociale.
Qyteti i Fierit renditet i treti në Shqipëri për nga rëndësia ekonomike. Ka një ekonomi të fuqishme dhe është qendra e Shqipërisë përsa i përket industrive të naftës, bitumit dhe bujqësisë.
