Shqipëria e mbylli vitin 2020 me një rënie drastike të volumit të tregtisë së jashtme, kryesisht si pasojë e rënies së konsumit të veshjeve e këpucëve si dhe rënies së çmimeve të mineraleve dhe të energjisë. Të dhënat e publikuara nga Instituti i Statistikave tregojnë se gjatë vitit 2020 volumi total i eksporteve dhe importeve të mallrave ishte 877 miliardë lekë (afërsisht 7 miliardë euro) me rënie 8% në krahasim me vitin 2019.
Importi i veshjeve dhe këpucëve ra me 94 milionë euro ose 13%, tregues ky i rënies së blerjeve nga qytetarët e zënë nga mbyllja e pandemisë dhe rënia e interesit veshje. Eksportet e Shqipërisë në veshje dhe këpucë ranë me 127 milionë euro ose 14% si pasojë e reduktimit të kërkesës për këto produkte në tregun botëror. Shumë prej veshjeve dhe këpucëve të prodhuara në Shqipëri shiten në Itali e Spanjë, vendet më të goditura nga pandemia. Eksportet dhe importet e lëndëve minerale dhe të naftës pësuan një rënie të dyfishtë, si në sasi ashtu edhe në çmime.
Në mënyrë të çuditshme, importi i materjaleve të ndërtimit qëndroi pothuajse në të njëjtin nivel me një vit më parë. Sektori i ndërtimit duket se ka vijuar të punojë ethshëm dhe çmimet e pronave të paluajtshme nuk kanë shënuar rënie pavarësisht krizës më të thellë ekonomike që vendi ka përjetuar në mbi dy dekada. Pastrimi i parave përmes ndërtimeve dhe blerjeve të pronave të patundshme është një nga supozimet që shpjegon këtë anomali. Gjatë vitit të kaluar Shqipëria importoi 78 miliardë lekë materiale ndërtimi (262 milionë euro.
