I plagosuri me emrin Romeo Mecaj (33 vjec), banor në lagjen “Pavarësia”. I riu është pronar i një lokali në Lungomare, ndërsa në momentin e atentatit ishte duke parkuar makinën.
Burimet nga policia bëjnë me dije se dyshohet se kanë qenë dy autorë të cilët kanë qëlluar me breshëri armësh në drejtim të automjetit tip “Land Rover”. I plagosuri është transportuar me urgjencë për në spital. Të riun e kanë kapur disa plumba në trup, ndër to në këmbë e në kraharor. Raportohet se është në gjendje të rëndë shëndetësore.
Ndërkohë policia ka gjetur një automjet tip “Golf 5” të djegur në zonën e ‘Ujit të Ftohtë’, që dyshohet se i përkiste autorëve, paraprakisht rezulton e vjedhur.
Vlorë/Informacion paraprak Më datë 05.03.2022, rreth orës 20:35, në afërsi të pallatit të sportit, në rrethana ende të paqarta, është plagosur me armë zjarri shtetasi R. M., 33 vjeç, banues në lagjen “Pavarësia”, Vlorë, i cili ndodhet nën kujdesin e mjekëve. Shërbimet e Policisë kanë shkuar menjëherë në vendngjarje, janë ngritur pika kontrolli në të gjitha pikat hyrëse-dalëse të Vlorës, me qëllim kapjen e autorëve.
Gjatë krehjes së zonës, shërbimet e Policisë kanë gjetur në zonën e quajtur “7 pallatet”, në afërsi të Ujit të Ftohtë, një automjet të djegur, brenda të cilit janë konstatuar dy armë zjarri kallashnikov të djegura. Grupi hetimor ndodhet në vendngjarje dhe është duke sekuestruar çdo provë të mundshme materiale që do të shërbejë për identifikimin e autorëve të ngjarjes.
