Ulen testimet por shtohet numri i rasteve të reja/ Arrihet numër rekord me raste të reja

Vazhdon të rritet numri i rasteve të reja me Covid-19, ndërkohë që bëhet me dije se në 24 orët e fundit janë konfirmuar 44 raste pozitive nga 291 testime të kryera. Nga të cilat: 21 Tirana, 4 Kamëz, 1 Gjirokastër, 1 Vlorë, 6 Kruja, 4 Shkodra 2 Lushnja, 1 Elbasani, 4 Durrësi. Kujtojmë se edhe dje ishte një ditë që shënoi rritje të numrit të rasteve me 42 të tilla, ndërkohë që kishte një numër më të madh të testimeve që ishin kryer. Rastet e reja priten të konfirmohen në deklaratën e përditshme që bën Ministria e Shëndetësisë. Ndërkohë Ministria e Shëndetësisë ka thënë më herët se: Kjo situatë nuk ishte kaq e papritshme për shkak të grumbullimeve masive që kanë ndodhur ditët e fundit. Jo vetëm grumbullimet, por edhe mosrespektimi i këshillave, në lidhje me distancimin fizik, në lidhje me mbajtjen e maskave, në lidhje me shumë elementë të tjerë të kujdesit personal qoftë edhe të higjienës. Të gjithë qytetarët, të gjithë ne duhet të jemi të përgjegjshëm që Covid19 nuk ka ikur nga vendi jonë. Deri më tani, deri në fillimin e hapjes së masave kishim një numër një shifror, e cila erdhi si rezultat i masave drastike, i sakrificës së gjithësecilit. Por kjo nuk do të thotë që me hapjen e masave ne të shpërdorojmë çdo këshillë dhe të shpërdorojmë atë që ne vetë sakrifikuam.